Rutahizamu w’Umunya-Brazil, Gabriel Jesus, ari hafi kuva muri Arsenal akerekeza muri FC Barcelona nyuma y’uko amakipe yombi yumvikanye ku ngingo z’ingenzi z’iyi transfer.
Amakuru mashya yatangajwe kuri uyu wa 30 Kanama 2026 avuga ko FC Barcelona iri hafi gusinyisha Gabriel Jesus ukinira Arsenal. Raporo zitandukanye zivuga ko impande zombi zageze ku bwumvikane ku masezerano y’uyu mukinnyi.
Barcelona yishyura hafi miliyoni 10 z’amayero
Barcelona yaba yemeranyijwe na Arsenal ku mafaranga agera kuri miriyoni 10 z’amayero, hakiyongeraho amafaranga ashobora gutangwa bitewe n’ibizagerwaho.
Sky Sports dukesha iyi nkuru ivuga ko ubu amakipe yombi ari gukorana kugira ngo hasinywe ibyangombwa bya nyuma by’iyi transfer.
Gabriel Jesus kandi ategerejwe muri Espagne aho azakorerwa mbere y’uko transfer ye ishyirwa ku murongo burundu.
Kuki Barcelona yashatse Gabriel Jesus?
Barcelona yari imaze igihe ishaka kongera imbaraga ku mwanya w’umwataka, nyuma y’uko Robert Lewandowski atakiri mu ikipe. Ikipe yo muri Catalunya yari yanashatse Julian Alvarez wa Atlético Madrid, ariko ibiganiro ntibyagenze uko yari yabyifuzaga.
Gabriel Jesus ashobora guha Barcelona ubunararibonye ndetse n’ubushobozi bwo gukina mu myanya itandukanye y’ubusatirizi.
Arsenal igiye gutandukana na Gabriel Jesus
Gabriel Jesus yageze muri Arsenal mu 2022 avuye muri Manchester City, mu masezerano yavuzwe ko yari afite agaciro ka miriyoni 45 z’amayero. Yari umwe mu bakinnyi Arsenal yagendeyeho cyane mu myaka ye ya mbere muri iyi kipe.
Ariko mu gihe cya vuba, umwanya we muri Arsenal waragabanutse, cyane cyane nyuma yo kwiyongera kw’abakinnyi bakina mu busatirizi. Ibi byatumye Arsenal yemera kumurekura muri iyi mpeshyi.
Niba medical ye izarangira neza ndetse n’ibyangombwa bigashyirwaho umukono, Gabriel Jesus azatangira urugendo rushya muri La Liga akinira Barcelona.
Uyu mukinnyi w’imyaka 29 ashobora kuba umwe mu bakinnyi Barcelona yizeho mu kongera imbaraga mu busatirizi bwayo.
Yanditswe na Mucyo Cyizere Patience/Pacis tv Kigali