Urubyiruko rw’abakorerabushake mu ntara y’uburengerazuba rwatangije ukwezi kw’ibikorwa by’ubukorerabushake ku musozi wa Rubavu mu karere ka Rubavu ahatewe ibiti bisaga 3400 rukavuga ko muri uku kwezi ruzubakira abaturage barindwi muri iyi ntara n’ubwiherero 880 mu rwego rwo kwimakaza isuku.
Umuganda wo gutera ibiti ku musozi wa Rubavu mu rwego rwo kurwanya isuri wanitabiriwe na guverineri w’intara y’uburengerazuba ndetse n’umuyobozi w’akarere ka Rubavu, ni wo watangije ibikorwa urubyiruko rw’abakorerabushake ruzakora muri uku kwezi.
Ntawuruhunga Abdul umuhuzabikorwa w’urubyiruko rw’abakorerabushake mu ntara y’uburengerazuba
Umuhuzabikorwa w’urubyiruko rw’abakorerabushake mu ntara y’uburengerazuba Ntawuruhunga Abdul avuga ko muri uku kwezi bateganya gukora ibikorwa biganisha ku mibereho myiza y’abaturage bibarirwa mu gaciro k’agera kuri miriyoni 50
Agira ati “Ni ibikorwa by’amaboko bizakorwa mu ntara hose. Hazubakirwa abaturage 7 batishoboye, ni ukuvuga umwe muri buri karere. Mu kurwanya umwanda tuzafasha imiryango 880 kubona ubwiherero,tuzatera ibiti ibihumbi 300 kuri site zateganyijwe, duteganya no gutanga inka 7”.
Guverineri w’intara y’uburengerazuba Ntibitura Jean Bosco yisangiye ibyishimo n’urubyiruko mu muganda wo gutera ibiti.
Guverineri w’intara y’uburengerazuba Ntibitura Jean Bosco ashima ibikorwa by’urubyiruko rw’abakorerabushake, akuva ko rushyira mu ngiro gahunda yo kuba imbaraga z’igihugu kandi zibaka vuba.
Ati “ Turabashimira kuko bumva vuba kandi imvugo ikaba ari yo ngiro kuri bo.
Uretse ibyo bikorwa , urubyiruko rw’abakorera bushake mu ntara y’uburengerazuba ruteganya kuzakora ibikora by’ubukangirambaga kuri gahunda ya reta yo kurwanya inzoga zitujuje ubuziranenge.
NDAYISABA Jean De Dieu.