Abahinzi n’abatubuzi b’imbuto z’ibirayi bo mu Karere ka Nyaruguru bavuga ko ibirayi byaho bikomeje kwigarurira isoko kubera ubuziranenge bwabyo. Ubuyobozi buvuga ko umusaruro wa hegitari imwe ugeze kuri toni zirenga 30.
Abahinzi bavuga ko kuba bakorera muri koperative byabafashije kungurana ubumenyi, kubona amasoko ndetse no kongera umusaruro. Banashimira ubuyobozi bw’Akarere ka Nyaruguru bukomeje kubafasha binyuze mu mahugurwa, kubegereza inyongeramusaruro no kubahuza n’abafatanyabikorwa batandukanye, bikabafasha guhinga kijyambere.
Umuyobozi w’Urugaga rw’Abikorera (PSF) mu Ntara y’Amajyepfo, Uwitije Bernard, yavuze ko Intara y’Amajyepfo ikomeje kwitwara neza mu guteza imbere ubuhinzi bw’imbuto z’ibirayi ndetse n’ikawa, kuko ari bimwe mu bihingwa bifatiye runini ubukungu bw’abaturage b’iyi ntara.
Yagaragaje ko imurikagurisha ari umwanya mwiza wo guhuza abahinzi n’abaguzi, kumenyekanisha umusaruro ndetse no gushaka amasoko mashya ashobora kurushaho guteza imbere ibikorwa byabo.
Umuyobozi w’Akarere ka Nyaruguru wungirije ushinzwe Iterambere ry’Ubukungu, Gashema Janvier, yavuze ko akarere gakomeje gushora imbaraga mu guteza imbere ubuhinzi bw’imbuto z’ibirayi hagamijwe kongera umusaruro no kuzamura imibereho y’abahinzi.
Yasobanuye ko akarere gafatanya n’abahinzi mu gukoresha imbuto z’indobanure, ifumbire ikwiye n’uburyo bugezweho bwo guhinga no gutubura imbuto, kugira ngo umusaruro ukomeze kwiyongera.
Kugeza ubu, ubuyobozi bw’Akarere ka Nyaruguru buvuga ko hegitari imwe y’ibirayi itanga umusaruro urenga toni 30. Ibi babishingira ku miterere myiza y’akarere, ubutaka bwera, ikoreshwa ry’ifumbire iboneye ndetse n’ubuhinzi bukoresha ikoranabuhanga.
Abahinzi bavuga ko bafite icyizere ko ubufatanye hagati yabo, ubuyobozi n’abafatanyabikorwa buzakomeza guteza imbere ubuhinzi bw’ibirayi, bityo Nyaruguru igakomeza kuba kimwe mu bice by’u Rwanda byihagazeho mu musaruro w’ibirayi bifite ubuziranenge.
