Mu ijoro ryakeye tariki 25 Kanama 2026 umunyarwanda Joy Lance Mickels yaraye akoze amateka adasanzwe yo kuba umunyarwanda wambere ugiye gukina imikino y’amatsinda ahuza amakipe yabaye ayambere iwayo ku mugabane w’uburayi azwi nka UEFA Champions League.
Mu mukino wahuzaga ikipe ya Sabbah FC ikinamo umunyarwanda Joy-Lance Mickels yanditse amateka akomeye nyuma yo gutsinda Hapoel Beer Sheva yo muri Israel ibitego 5-2 nyuma y’iminota 30 y’inyongera, ihita ikatisha itike yayo muri UEFA Champions League bwa mbere mu mateka.
Uyu mukino wabereye kuri Tofiq-Bahramov Stadium i Baku muri Azerbaijan ku wa Kabiri, aho Sabah FC yari ifite inshingano zikomeye zo guhindura ibyari byabaye mu mukino ubanza, ubwo yari yatsinzwe na Hapoel Beer Sheva ibitego 2-1.
Ariko muri iyi nkuru tugiye kugaruka kuri rutahizamu mpuzamahanga w’umunyarwanda Joy Lance Mickels waciye agahigo ko kuba kugeza aka kanya ariwe munyarwanda wenyine rukumbi ugiye kwitabira imikino ya UEFA Champions League.
Joy Lance ni muntu ki? Yavukiye he? Yakuze ate?
Mickels ni rutahizamu w’ikipe y’Igihugu “Amavubi”, akaba afite imyaka 32 y’amavuko kuko yavutse tariki ya 29 Werurwe 1994. Nyina ni Umunye-Congo naho se witwa Mickels Jacques Akilimali ni Umunyarwanda. Yavukiye mu Budage.
Yatangiye gukina umupira w’amaguru afite imyaka ine mu ikipe y’abato ya VSF Amern, nyuma yinjira mu ishuri ry’umupira rya Borussia Mönchengladbach aho yamaze imyaka umunani.
Mu mwaka w’imikino wa 2012/13 yigaragaje cyane mu Ikipe y’Abatarengeje imyaka 19 ya Borussia Mönchengladbach, atsinda ibitego 17 anatanga imipira itatu ivamo ibitego, byanatumye ikipe ye igera muri 1/2 cya DFB Junior Cup.
Icyo gihe yahise azamurwa ashyirwa mu ikipe ya kabiri yayo ari yo Borussia Mönchengladbach II, yamweretse andi makipe ahita abengukwa n’ikipe ya kabiri ya Schalke 04 II.
Mu mikino 43 yakiniye iyi kipe yari mu Cyiciro cya Kane mu Budage kizwi nka Regionalliga, yatsinze ibitego icyenda mbere y’uko ajya muri Alemannia Aachen mu 2016 akahamara igihe gito, ahita ajya muri Wacker Nordhausen.
Mu mwaka we wa mbere muri Wacker, yatsinze ibitego bitandatu atanga n’imipira 12 yavuyemo ibitego, anafasha ikipe gusoreza ku mwanya wa kabiri ndetse banatwara igikombe cya Thuringian Cup.
Nyuma y’aho, Mickels yakiniye FC Carl Zeiss Jena yo mu Cyiciro cya Gatatu mu Budage, ahava ajya mu Buholandi muri MVV Maastricht yo mu Cyiciro cya Kabiri. Aha yahatsindiye ibitego birindwi mu mikino 27 yakinnye mu mwaka umwe.
Yakomereje muri Sabah FC yo mu Cyiciro cya Mbere muri Azerbaijan, mu myaka ibiri atsinda ibitego 29, byatumye abengukwa na Al-Faisaly yo muri Arabia Saoudite.
Iyi Sabah yongeye kuyisubiramo mu 2024, ari na ho Umutoza w’Amavubi Adel Amrouche yamutereye imboni ajya kumuhamagara bwa mbere mu Ikipe y’Igihugu. Kuri ubu inkuru nshya igezweho ni uko yafashije Sabah FC kubona itike ya Champions League.
Impano y’umupira w’amaguru si iyo yisangije wenyine mu muryango we, dore ko n’abavandimwe be babiri ari bo Joy-Slayd Mickels w’impanga ye na murumuna wabo Leroy-Jacques Mickels ari abakinnyi ba ruhago.
MUCYO CYIZERE Patience/PACIS TV