Emiliano Martínez yatangiye ubuzima bwe bushya muri Chelsea, nyuma yo kuva muri Aston Villa, ndetse ntiyatinze kugaragara mu kibuga mu mukino wa mbere w’ikipe ye nshya.
Umuzamu w’Umunya-Argentina uzwi cyane ku izina rya Dibu Martínez, yinjiye muri Chelsea azanye ubunararibonye bwinshi bwo gukina ku rwego rwo hejuru.
Martínez yahise ahabwa umwanya wo gukina mu mukino Chelsea yatsinzemo Brighton & Hove Albion ibitego 4-3, mu mukino wa Premier League wabereye kuri Stamford Bridge.
Uyu mukino wari udasanzwe kuko Chelsea yatangiye neza, ariko Brighton iza kugaruka mu mukino, bituma habaho guhangana gukomeye kugeza ku munota wa nyuma.
Nubwo Chelsea yatsinze, Martínez ntiyagize umukino woroshye kuko ikipe ye yinjijwemo ibitego bitatu. Gusa intsinzi ni yo yari ingenzi ku ikipe, kuko yabashije kubonamo amanota atatu.
Martínez azanye ubunararibonye muri Chelsea
Kugera kwa Martínez muri Chelsea ni igikorwa ikipe yizeho cyane, kuko uyu muzamu amaze imyaka myinshi akina ku rwego rwo hejuru.
Yamenyekanye cyane ubwo yari mu izamu rya Argentina, aho yagize uruhare rukomeye mu ntsinzi z’ikipe y’igihugu, zirimo Igikombe cy’Isi cya 2022.
Ubuhanga bwe bwo gukiza penaliti, gutuza mu mikino ikomeye ndetse no kugira icyizere mu izamu ni bimwe mu byatumye aba umwe mu bazamu bazwi cyane ku isi.
Chelsea imwitezeho byinshi
Chelsea yizeye ko Martínez azafasha ikipe gukomera mu kibuga cy’inyuma no guhangana mu marushanwa atandukanye.
Nubwo umukino we wa mbere utamubereye mwiza cyane ku bijyanye n’ibitego yinjijwe, intsinzi ya Chelsea kuri Brighton yamuhaye intangiriro nziza y’urugendo rwe rushya.
Abafana ba Chelsea ubu barategereje kureba uko Dibu Martínez azitwara mu mikino iri imbere, ndetse niba azashobora kuba umwe mu bazamu bakomeye bagize amateka y’iyi kipe.
Urugendo rwa Martínez muri Chelsea ruratangiye, kandi abafana barifuza kumenya niba uyu muzamu w’Umunya-Argentina azabasha kugarura icyizere mu izamu rya Chelsea.
Yanditswe na MUCYO CYIZERE Patience/Pacis Tv Kigali.