Minisiteri y’ibidukikije ivuga ko mu mwaka wa 2025 ubwiyongere bwa dosiye z’ubutaka zikubye hafi inshuro 3, bikaba ariyo mpamvu nyamukuru itera iyi mikorere mibi.
Hon Nsangabandi Ernest, agaragaza ko amakosa ashingiye ku mbibi, aho usanga imbibi zinjiranamo, bigateza ibibazo abaturage
Ati: amakosa yakozwe mu gihe cyo kwandika ubutaka aho ibyangombwa byinjiranamo, abaturage bafite ibibazo mu byangombwa, iyo basabye inguzanyo mu bigo by’imari ntabwo bahabwa inguzanyo, ikindi kandi aya makosa ashinghiye ku mbibi, agira ingaruka ku basora, aho hari abasora menshi batakabaye bayasora, ndetse n’abasora make kandi atariyo bakagombye gutanga.
HON NSANGABANDI ERNEST
Hon. RUTEBUKA Balinda yaragagaje ko hari ahubatswe imidugudu nyuma bakaza kwisanga hashyizwe mu buhinzi, aribaza ati bazafashwa na nde?
Ati: Iriya midugudu aho abaturage bari baratujwe mbere mu midugudu, nyuma igishushanyo mbonera kiza guhinduka hashyirwa mu buhinzi, aba baturage ntibagerwaho n’ibikorwaremezo ndetse ntibemerewe no gusana , aba baturage ninde wo kubarengera?
Hon. TUMUKUNDE Marie Ange nawe agaragaza ko hari abaturage bo mu karere ka Rubavu barenga 400, babwiwe ko aho batuye ari mu cyanya cy’inganda, kuri ubu bakaba badafite uko basana inzu zabo.
HON. TUMUKUNDE MARIE ANGE
Ati;”Umwihariko twasanze mu karere ka Rubavu, umurenge wa Nyakiliba hatuye imiryango irenga 400, igishushanyo mbonera cyasohotse, cyagaragaje ko hazashyirwa icyanya cy’inganda, aba baturage twasanze nta makuru bafite y’igihe bazimurwa, ndetse n’amazu yabo yatangiye gusenyuka kuko batemerewe kugira icyo bakora.
Minisitiri w’ibidukikije Dr. ARAKWIYE Bernadette, mu bisobanuro yatanze yavuze ko mu mwaka wa 2025, hakozwe dosiye zirenga ibihumbi managa inani mirongo itandatu n’enye na maganane na makumyabiri n’eshanu, ibi bikaba intandaro y’imitangire mibi ya serivise, gusa aratanga icyizere kuko hashyizweho ingamba zo gukemura ibi bibazo.
MINISITIRI W’IBIDUKIKIJE DR. ARAKWIYE BERNADETTE
Ati:”Mu mwaka ushize wa 2025, hakozwe dosiye 80.064.425, ubu bwiyongere nibwo bwatumye serivise z’ubutaka zigenda nabi, gusa hafashwe ingamba zo kubikemura harimo guhuza serivise z’ubutaka n’izindi nzego, aho mu gihe uwasabye serivise yasabiwe mu rundi rwego rwa leta, akaba azakenera guhabwa icyangombwa cy’ubutaka, izo nzego zizajya zikorana na sisiteme ya serivise y’ubutaka hatabayeho kongera kujya gutanga serivise y’ubutaka, ibi bizatangira mu kwezi kwa 6, 2026 kandi byitezweho kugabanya umubare wa dosiye ho 10% .
Muri rusange, ibibazo bigaragara muri serivise z’ubutaka bigaragaza ko hakiri imbogamizi mu mikorere no mu ishyirwa mu bikorwa rya politiki n’amategeko birebana n’imicungire y’ubutaka.
Gutinda kwa serivisi, amakosa mu ikoranabuhanga rya LAIS, amakimbirane ashingiye ku mbibi, ihindurwa rya site zagenewe guturamo, hamwe n’ibirego bya ruswa n’ibiciro bidahuye, byose bigira ingaruka ku burenganzira bw’abaturage no ku iterambere rirambye.
UMWANDITSI: EMINENTE UMUGWANEZA/PACISTV/KIGALI