Padiri Roberto Regoli usanzwe yigisha Amateka muri Université pontificale grégorienne i Roma niwe watorewe kuyobora umuryango wa Papa Benedigito XVI akaba asimbuye Padiri Federico Lombardi wari umaze imyaka 10 ayobora uwo muryango.
Padiri Roberto Regoli na Padiri Federico Lombardi
Padiri Roberto Regoli asanzwe ari umuhanga mu mateka, agiye kuyobora uyu muryango ugamije gushishikariza abatuye isi gucengerwa mu buryo bwimbitse inyigisho za Papa Benedigito XVI hategurwa ibiganiro by’ abahanga n’ inyandiko.
Padiri Roberto Regoli ayobora ishami ryigisha amateka ya Kiliziya ( département d’histoire de l’Église),ayobora ikinyamakuru Archivium Historiae Pontificiae, akaba yaranditse inyandiko z’ ubuhanga hamwe ibitabo bivuga ku mateka y’ Abapapa, ubuyobozi bwa Kiliziya, ndetse n’ umubano wa Kiliizya n’ amahanga mu kinyajana cya XIX na XX.
Padiri Roberto Regoli asimbuye Padiri Federico Lombardi ufite imyaka 83 akaba yarayoboye uyu muryango muri manda 2 zingana n’ imyaka 10.
Padiri Federico Lombardi wari umaze imyaka 10 ayobora uwo muryango.
Hakurikijwe amategeko agenga umuryango fondation Ratzinger, ubuyobozi bwawo bushyirwaho n’ ubunyamabanga bwa Leta ya Vatican. Abandi bagiye gukomeza gufatanya na Padiri Roberto Regoli harimo Musenyeri Georg Gänswein,ubu ni intumwa ya Papa muri Lituania akaba yaranabaye igihe kinini umunyamabanga wihariye wa Papa Benedigito XVI, harimo kandi professeur Achim Buckenmaier; Uwunganira abandi mu mategeko (avocate) Francesca Bazoli na Dr Alberto Gasbarri,wahoze ashinzwe ubutegetsi muri Radio Vatican.
( Source: VATICAN NEWS ).
UMWANDITSI:Maurice BISENGIMANA/PACISTV