Diyosezi gatolika ya Kabgayi yatangije ishuri rishya ryitiriwe Umushumba mwiza (GS le Bon Pasteur), riherereye muri Paruwasi ya Kinazi mu karere ka Ruhango mu murenge wa Kinazi, Abanyeshuri bimuriwe muri iri shuri bavanwe mu bigo birikikije aho bigaga bacucitse, bakaba basabwe guharanira kugira ubuhanga umutimanama no gutsinda.
ISHURI RISHYA RYITIRIWE UMUSHUMBA MWIZA (GS LE BON PASTEUR) RIHABWA UMUGISHA
Umunyeshuri wiga mu mashuri yisumbuye wimuriwe kuri iki kigo cy’amashuri gishya cyaragijwe Umushumba mwiza(GS Le Bon Pasteur), avuga ko aho bigaga bari bacucitse ku buryo batabashaga kwiga neza.
Ati: “Ndashimira ubuyobozi budufashije kuri ubu tukaba tugiye kujya twiga neza, kuko ubusanzwe aho twigaga twari dufite ubucucike ku buryo ku ntebe imwe twicaragaho turi batanu bityo bikatugora gukurikira Mwarimu”.
Mugenzi we nawe avuga ko baruhutse ikibazo cy’ubucucike cyatumaga batiga neza ku buryo kuri ubu bizeye kuzatsinda.
Ati: “Aho twigaga mu ishuri rimwe twabaga tugera kuri 80, byatumaga tutiga neza ku buryo bamwe bavaga mu ishuri, ariko ubu tugiye kwiga twicara ku ntebe turi babiri muri make tuziga neza”.
HATAHWA KU MUGARAGARO ISHURI RYO MU KARERE KA RUHANGO RIRI MURI DIYOSEZI YA KABGAYI
Sr Marie Domitille umuyobozi w’agateganyo w’iri shuri rishya, avuga ko bagiye gukora cyane, ariko kandi agasaba ko ibibazo bafite byakwitabwaho.
Ati: “Mbere na mbere navuga ko nk’ikigo gishya tugiye gukora cyane dushaka intsinzi, ariko hari ibyo twasaba ko bya kwitabwaho nko kubaka aho abayobozi bakorera kuko ubu dukorera mu cyumba cy’ishuri, mudasobwa na interinete byo gufasha abanyeshuri nabyo birakenewe ko byitabwaho”.
Umunyamabanga Nshingwabikorwa w’Akarere ka Ruhango iki kigo cy’amashuri kibarizwamo avuga ko bagiye kuba hafi ubuyobozi bwacyo bugafashwa kugirango kibashe gukora no gutera imbere.
Iri shuri ryaragijwe umushumba mwiza, rikaba kuri ubu ritangiranye abanyeshuri bagera kuri 320, barimo abo mu mashuri abanza kuva muwa mbere kugera mu mwaka wa g atanu n’abo mu mashuri yisumbuye bazanywe bakaba bava mu mwaka wambere kugera mu mwaka wa kabiri.
UMWANDITSI:Aimable UWIZEYIMANA/PACISTV/KAMONYI
ANDI MAFOTO
